المعالجة المحاسبية لمردودات المبيعات
اثبات مردودات المبيعات
طبقا للمعيار رقم ٤٨ مصري و IFRS 15 الايراد من عقود العملاء انه تم استحداث معالجة للموضوع لانه زمان كان لا يتم الاعتراف بالمردودات الا عند حدوثها فعليا فاللجنة الخاصة بالمعايير قالت الكلام ده مش سليم لانه ازاي احمل مردودات مبيعات خاصة بفترة سابقة بمبيعات الفترة وبالتالي هنا كده في الحالة دي مفيش تطبيق لمبدأ المقابلة الربح اللي هيطلع هيكون متأثر بحاجة جاية له من فترة سابقة فالمعيار قال لك هنا الايراد اصبح متغير يعني قيمة العوض النقدي او المبلغ المقابل المتوقع تحصيله تغيرت وبالتالي يتم تحديد قيمة الايراد او العوض النقدي باستخدام الطريقة المتوقعة اللي هي نسبة تحقق الايراد × قيمة المبيعات فلو انت متوقع انه من قيمة المبيعات بتاعتك العميل هيعمل مردودات مبيعات بنسبة ١٠% فيبقى الايراد المتوقع هنا ٩٠%
طيب المعالجة :
على سبيل المثال بعت بضاعة قيمتها ١٠٠٠٠٠ قبضتها نقدا وكانت تكلفتها ٨٠٠٠٠ والعميل طبقا لخبرات الشركة هيعمل مرتجع بنسبة ١٥% نثبت الكلام ده ازاي
١- الاول هتثبت الفلوس النقدي
٢- هنا الايراد متغير يعني هعترف بالايراد وفقا للاكيد انه هيتحقق فهنا هيرجع ١٥% يبقى = ١٠٠٠٠٠ × ٨٥% = ٨٥٠٠٠
٣- طب والفرق هفتح به مخصص اسمه مخصص مردودات مقدرة يبقى معالجة البيع
١٠٠٠٠٠ من ح / النقدية
الى مذكورين
٨٥٠٠٠ الى ح / الايرادات
١٥٠٠٠ الى ح / مخصص التزامات مردودات مقدرة
٤- طيب لما تيجي تثبت قيد التكلفة اسأل نفسك سؤال هل انا اعترفت بال ١٠٠٠٠٠ كلهم علشان اثبت ال ٨٠٠٠٠ بالكامل كتكلفة بضاعة مباعة ؟؟! لا يبقى انا هثبت التكلفة اللي تعكس الايراد المعترف به = ٨٠٠٠٠ × ٨٥% = ٦٨٠٠٠ طب والباقي زي ما فتحت مخصص للمردودات المقدرة هتفتح حساب اسمه مخزون مردودات مقدرة وتخفض المخزون بالبضاعة اللي طلعت كلها على الرغم انك ما اعترفتش الا ٨٥% هقول لك بس مبيعاتك اللي خرجت من المخزون قيمتها ١٠٠٠٠٠ وتكلفتها ٨٠٠٠٠ دي حاجة
لوحدها غير اللي انت اعترفت به كايراد اكيد الحدوث يبقى المعالجة
من مذكورين
٦٨٠٠٠ ح / تكلفة البضاعة المباعة
١٢٠٠٠ ح / مخزون مردودات مقدرة
٨٠٠٠٠ الى ح / المخزون
طيب توقعات الشركة طلعت في محلها ورجع ال ١٥% !! ساعتها الحسابات الجديدة اللي انت فتحتها هتقفلها
١٥٠٠٠ من ح / مخصص مردودات مقدرة
١٥٠٠٠ الى ح / النقدية
وبعد كده
١٢٠٠٠ من ح / المخزون
١٢٠٠٠ الى ح / مخزون مردودات مقدرة
المصدر
اسلام_واصل
تعليقات
إرسال تعليق