( التضخم وطباعة العملة - علم الإقتصاد )
أغلب الناس مش فاهمة موضوع التضخم، ودا مهم جدا إنك تفهمه عشان تحافظ على مدخراتك واستثماراتك،
عشان كدا هحاول بقدر الإمكان أبسط هذا الموضوع لأقصى درجة ممكنة
التضخم لغة ً معناه " إزدياد حجم الشيء ومن ثم يصبح أكثر ضخامة "
وإصطلاحا معناه " نقود كثيرة تطارد وحدات إنتاج قليلة "
- هناك نوعين من التضخم :
1- التضخم النقدي
2- التضخم السعري
يقابل التضخم حالة إسمها ( الإنكماش )
هنشرحهم بشكل تفصيلي، بس عشان نفهم الموضوع بشكل أعمق، نركز على الحاجتين دول:-
الإنتاج ( السلع والخدمات ) فى كفة،
والنقود ( العملة ) فى كفة،
تخيل معي المثال التالي :-
نفترض مجموعة من الناس عايشين على جزيرة صغيرة منعزلة تماما
ومافيش حكومة فى الجزيرة تتحكم فى عملية الإنتاج ولا تحديد السعر
بمعنى إن أهل الجزيرة أحرار فى حياتهم، وسوقها حر.
ونفترض الناس دي بتشتغل وبتنتج سلع وخدمات بمقدار 1000 وحدة في السنة.
من ناحية السلع، كيلو الطماطم وحدة، كيلو الأرز وحدة، كيلو اللحمة وحدة، قزازة زيت وحدة، بدلة شيك وحدة، سيارة واحدة وحدة، برميل البترول وحدة،،، إلخ.
من ناحية الخدمات، مكالمة التليفون لمدة ساعة وحدة، خدمة معالجة مريض واحد وحدة، الإنتقال بالمواصلات مرة واحدة وحدة، تصليح سيارة واحدة وحدة،،، إلخ
أنا عارف إن الوحدات غير متكافئة فى القيمة والمقدار ولكن هذا على سبيل الفرض.
يبقى المجموع الكلي للسلع والخدمات ( الإنتاج ) فى الجزيرة دي = 1000 وحدة.
بعد كدا الناس فى الجزيرة إتفقوا إنهم يوكلوا مجموعة صغيرة منهم ( أُمناء ) تكون مهمتهم طباعة عملة موحدة عشان يتعاملوا بيها ويسهلوا عملية تبادل السلع والخدمات الى بينتجوها بينهم وبين بعضهم،
وكانت العملة دي هي الجنيه
وإتفقوا إنهم يطبعوا 1000 جنيه يتعاملوا بيها فى سوق الجزيرة
* يبقى كمية العملة الكلية المطبوعة المتداولة فى سوق الجزيرة دي = 1000 جنيه
كدا عندنا 1000 وحدة سلع وخدمات، 1000 وحدة من العملة ( الجنيه )
إزاى نحدد السعر ؟!
تحديد السعر له عوامل كثيرة، منها مدى أهمية السلعة، قيمة المصنعية، السلعة نادرة ولا متوفرة بكثرة في السوق، قوى العرض والطلب وهكذا،،
طبقا لمبدأ التوازن بين الإنتاج والعملة المتداولة فى السوق، لازم كمية السلع والخدمات تستوعب كل الفلوس الموجودة فى سوق الجزيرة والعكس صحيح،
وبما إن الكفتين متساويتين ( الإنتاج والعملة ) هنفترض إن السعر كالآتي :
وحدة واحدة من السلع والخدمات = وحدة واحدة من العملة المطبوعة
السلعة الواحدة = جنيه واحد ،، الخدمة الواحدة = جنيه واحد
أظن كدا الموضوع واضح وبسيط، لو مفهمتش الجزئية دي إرجع إقرأها تاني.
طيب، نفترض بقى إن بعد فترة من الزمن، الناس المسئولين فى الجزيرة عن طباعة العملة ( الأمناء ) قرروا يطبعوا 1000 جنيه إضافية يتعاملوا بيها فى السوق بدون ما ينتجوا سلع وخدمات أكثر، ايه الى هيحصل ؟!
كدا أصبح الكمية الكلية من العملة المطبوعة = 2000 جنيه، والكمية الكلية للسلع والخدمات = 1000 وحدة زي ما هي
كدا أصبحت كمية العملة المطبوعة فى السوق أكبر من كمية السلع والخدمات الى تم إنتاجها.
التجار هيحسوا علطول إن بضائعهم بتتحسب بسرعة أكبر من الأول،
بمعنى إن عملية الشراء بقت أسرع من الأول وفي فلوس زيادة فى السوق،
بمعنى أخر، كدا مافيش توازن بين كمية العملة المطبوعة والإنتاج فى السوق
كدا التجار هتعدل السعر عشان بضائعهم متتسحبش كلها بسرعة على سعر قليل عشان نرجع لنقطة التوازن تاني،
يبقى السعر هيفضل يرتفع لحاد ما يوصل لــ نقطة التوازن الى عندها السعر يكون :
السلعة الواحدة = 2 جنيه ،، الخدمة الواحدة = 2 جنيه
ومن هنا نفهم معني التضخم النقدي : حدوث إزدياد فى كمية النقد ( الفلوس ) فى السوق أكبر من المعدل الطبيعي المقابل لكمية السلع والخدمات فى نفس السوق، ومن ثم يحدث إرتفاع سريع في الأسعار.
طيب خلينا مع نفس المثال السابق، السوق فيه 1000 وحدة سلع وخدمات و 2000 جنيه
نفترض إن في واحد من تجار الجزيرة إجتهد وربح 500 جنيه من السوق وقرر إنه يدخرهم فى خزنة عنده فى البيت، وعدى فترة شهر مثلا،
التجار فى السوق هيحسوا إن بضائعهم بتتسحب أقل من الأول، يعني عملية البيع والشراء قلت عن الأول والفلوس نقصت من السوق،
كدا التجار هيبدأوا يقللوا سعر بضائعهم عشان يرجعوا السوق لنقطة التوازن تاني وعملية البيع والشراء تنشط تاني،
وبكدا السعر هيفضل يقل لحاد ما يوصل لنقطة التوازن الى عندها السعر يكون :
السلعة الواحدة = 1.5 جنيه ،، الخدمة الواحدة = 1.5 جنيه
ومن هنا نفهم معني الإنكماش النقدي : حدوث نقص فى كمية النقد ( الفلوس ) المتداولة في السوق.
طيب نرجع للمثال الأولاني، لما كان سوق الجزيرة فيه 1000 وحدة من السلع والخدمات يقابلها 1000 جنيه.
نفترض إن حصل إنخفاض فى إنتاج السلع والخدمات بمقدار 500 وحدة لأى سبب كان ( مثلا قله سقوط الأمطار وحدوث جدب وتدهور الزراعة، إنتشار الجراد وفساد المحاصيل الزراعية، نقص فى موارد الطاقة كالبترول والغاز الطبيعي، إنتشار وباء قتل نصف سكان الجزيرة،،، إلخ )
كدا الإنتاج الكلي لسكان الجزيرة = 1000 - 500 = 500 وحدة
وكمية العملة المطبوعة فى السوق زي ما هي = 1000 جنيه
بمعنى إن الإنتاج الكلي أصبح أقل من كمية العملة المتداولة فى السوق.
كدا التجار هيضطروا يرفعوا أسعار بضائعهم عشان متتسحبش بسرعة لأنها قلت عن الاول.
وبكدا السعر الجديد هيبقى :
السلعة الواحدة = 2 جنيه ،، الخدمة الواحدة = 2 جنيه
- ومن هنا نفهم معني التضخم السعري: حدوث إرتفاع عام ومستمر فى أسعار السلع والخدمات فى السوق نتيجة نقص إنتاج السلع والخدمات.
طيب، نفترض بقى إن بعد فترة من الزمن، ربنا فتح أبواب رزقه على سكان الجزيرة مثلا ونزل مطر كثير والأرض أنتجت محاصيل أكثر، أو سكان الجزيرة إستخدموا سماد زراعي يزود إنتاج الأرض، أو تم إكتشاف آبار بترول وغاز طبيعي ومناجم حديد، وتم تشغيل ناس أكتر فى مصانع الجزيرة، وزاد إجمالي إنتاج السلع والخدمات ووصل لــ 2000 وحدة، وكمية العملة المطبوعة زي ما هي 1000 جنيه.
كدا التجار هيلاقوا عندهم بضائع أكثر من اللازم لإستهلاك سكان الجزيرة، ويبدأوا يعملوا عروض وتخفيضات فى أسعار البضائع دي عشان يخلصوا منها،
وبكدا السعر الجديد هيبقى :
السلعة الواحدة = 0.5 جنيه ،، الخدمة الواحدة = 0.5 جنيه
- ومن هنا نفهم معني الإنكماش السعري: حدوث إنخفاض عام ومستمر فى أسعار السلع والخدمات فى السوق نتيجة زيادة إنتاج السلع والخدمات أكثر من اللازم.
الشرح السابق دا كان نموذج مبسط لفهم المشكلة الرئيسية للتضخم ومدى خطورة وقوع سلطة طباعة العملة في يد الشخص الغلط !!
وطبعا في هذا النموذج إحنا عزلنا مؤثرات كتيرة على مشكلة التضخم زي التجارة الخارجية ومعدل الديون وتدخل الحكومة في ضبط الأسواق وسن القوانين وضبط معدلات الرسوم والضرائب والجمارك وما شابه ذلك.
طيب إزاي نفرق بين التضخم النقدي والتضخم السعري ؟
- لما تلاحظ إرتفاع فى أسعار كل السلع والخدمات فى السوق بدون إستثناء، دا معناه تضخم نقدي، يعني مشكلة التضخم حصلت بسبب الإفراط فى طباعة العملة بشكل رئيسي، بالإضافة لإزدياد معدلات الرسوم والضرائب.
- لما تلاحظ إرتفاع فى أسعار سلع بعينها أو خدمات بعينها دون باقي السلع والخدمات، زي مثلا إرتفاع أسعار الوحدات السكنية ( الشقق والبيوت ) نتيجة إزدياد أسعار الحديد والأسمنت، أو إرتفاع أسعار المحاصيل الزراعية بس، دا معناه تضخم سعري، يعني مشكلة التضخم حصلت بشكل رئيسي بسبب إنخفاض السلعة أو الخدمة قصاد كمية العملة المتداولة، بالإضافة لإزدياد معدلات الرسوم والضرائب على السلع والخدمات الى إرتفع سعرها.
مع ملاحظة :-
المقياس الحقيقي الذي يحدد رفاهية الناس داخل دولة ما هو مقدار ما ينتجوه من سلع وخدمات.
الإكثار من طباعة العملة دون زيادة حقيقية فى مقدار السلع والخدمات يعتبر نهب لثروات الأمم.
تعليقات
إرسال تعليق