اولا : شراء الاصول الثابته ,,
( أ ) تعالى نشوف انا لما بشترى اصل نقدا بيكون المعالجه ازاى ؟؟؟؟ و بفرض ان الاصل = 300 الف جنيه , و انا اشتريته بشيك ( نفس معالجه النقدى )
300 من ح \ الاصول الثابته
- الات و معدات \ مولد كهرباء ستانفورد 350 المانى .
300 الى ح \ بنك الرياض
- شيك رقم 256 لامر شركه الراجحى للمعدات
طيب ..,,, دى المعالجه البسيطه للاصل و الطريقه التقليديه اللى بتتبع ,,,,,
( ب ) بفرض انى اشتريت الاصل ده من شركه الراجحى بس هدفع على 4 دفعات متساويه هعمل ايه ؟؟
سهله اوى يا مان و يا وومان ,,, اول ما اشترى الاصل ده و ادفع الدفعه الاولى هثبت الاصل عندى مدين طبعا .. و اثبت الراجحى دائن فى حساب اسمه \ دائنو شراء اصول ثابته ,,كده يعنى
300 من ح \ اصول ثابته
- الات و معدات \ مولد كهرباء ستانفورد 350 المانى .
الى مذكورين
220 ح \ دائنو شراء اصول ثابته
- شركه الراجحى للمعدات ,,
75 ح \ بنك الرياض
- شيك رقم 555 لامر شركه الراجحى للمعدات
و كل ما ادفع دفعه بعمل قيد اخفض بيه دائنو شراء الاصول طبعا .. و بما ان ده حساب طبيعته دائن يبقى انا لازم اخليه مدين علشان اقلل الحساب ده ...و القيد تماما كده ,,,
75 من ح \ دائنو شراء اصول ثابته
- شركه الراجحى للمعادت
75 الى ح \ بنك الرياض
شيك رقم 566 لامر شركه الراجحى للمعدات
طيب تعالى نشوف كده حساب الاستاذ الجزئى ده عامل ازاى بعد الاربع دفعات ...
ح \ شركه الراجحى للمعدات ,,
| التاريخ | بيان | مدين | دائن | رصيد |
| | ح \ الاصول الثابته | | 225 | 225 |
| | ح \ البنك | 75 | | 159 |
| | ح \ البنك | 75 | | 75 |
| | ح \ البنك | 75 | | 00 |
| الرصيد | 227 | 227 | 00 | |
كده شفنا اننا اثبتنا الاصول فى الاول ودفعنا كل الدفعات الباقيه و قفلنا حسابه و كل عام وانتم بخير ,,
و عاوز ابين كمان انا ازاى بفتح الحسابات دى فى الدليل علشان اللى مش عارف اهو يعرف :
الحساب الرئيسى : الخصوم الحساب الفرعى : خصوم متداوله
الحاسب الجزئى : دائنو شراء اصول ثابته
n تحت الحساب ده بقا بنفتح صفحه لكل واحد زى الموردين تماما بتتبع نفس الترتيب كده ,,
( ج ) حاله كمان هى انى حصلت على الاصل ده عن طريق الهبه او المنحه من شخص ما او جهة ما , يعنى انا لم ادفع فيه ولا قرش ,,, اثبته ازاى ؟؟؟؟؟ طبعا يا باشا فى راس المال عدل ل ل ل ل
300 من ح \ الاصول الثابته
- الات و معدات \ مولد كهرباء ......
300 الى ح \ راس المال
طيب بفرض ان هناك 3 شركاء ,,,,, عادى جدا اقسم الاصل عليهم
300 من ح \ الاصول الثابته
- الات و معدات \ مولد كهرباء ......
300 الى ح \ راس المال
100 – راس مال الشريك أ
100 – راس مال الشريك ب
100 – راس مال الشريك ج
كده انا عليت الاصول ب 300 الف و حسبت كل واحد حصه متساويه بفرض انهم متساويين اصلا فى الحصص بتاعتهم الى دفعينها فى راس المال او يقسم على اساس حصه كل واحد منهم او على حسب الاتفاق
( د ) هناك حوار كمان ,,, لو انا اشتريت اصل و دفعت ثمنه بس لسه مش جه لحد عندى ,,,,
مثلا انا اشتريت معده و اتفقت مع الشركه انى هدفع دفعه 200 الف عند التعاقد و من ثم 200 الف عند تجهيز الاصل ثم 240 الف عند التركيب ثم 100 بعد التجربه و العمل ... هنعمل ايه ؟؟
فى ناس قالو اننا نثبت الكلام ده فى ح \ دائنو شراء اصول ثابته ..,,, و نعلى الدفع و لما يجى الاصل نقفله مع حسابهم و نثبت الاصل ,,, انا قول غلط و مش موافق مع احترامى ليهم بلان اصل الحساب ده دائن و اسمه دائنو ,,,, يبقى الاولى انى مش اسجل اول 3 دفعات مدينه لانه كده هيدينى رصيد الحساب شاذ .
فى ناس تانى قالو اننا نحط الحساب ده فى حسابات مدينه تحت التسويه ,,,او مدينى شراء اصول ثابته ,,
وانا اعترض معاهم مع كامل احترامى ليهم لان الحساب ده هيدخل متداول وانا شارى اصل ثابت و كمان مدينه ده اجه هسهس كده وانا مش موافق و خلاص وانا حر ,,, هع هع هع
ناس تالت قالو احنا بقا نوسط حساب اسمه \ انفاق ( او تكوين ) استثمارى ( والاتنين قريبين اوى من بعض) وانا موافق على الراى ده ,,,, و هنثبت الكلام ده كده تحديدا ,,و هنشوف اثره ,,
اول ما ادفع الدفعه المقدمه
200 من ح \ انفاق استثمارى
- شركه الرافعه البرجيه الحديثه (دفعه مقدمه لشراء رافعه برجيه \ 30 طن – كات )
200 الى ح \ البنك الاهلى
- شيك رقم .... لامر .....
اول ما ادفع الدفعه الثانيه
200 من ح \ انفاق استثمارى
- شركه الرافعه البرجيه الحديثه (دفعه ثانيه لشراء رافعه برجيه \ 30 طن – كات )
200 الى ح \ البنك الاهلى
شيك رقم .... لامر .....
اول ما ادفع الدفعه الثالثه عند وصول الاصل و التركيب .
240 من ح \ انفاق استثمارى
- شركه الرافعه البرجيه الحديثه (دفعه ثالثه لشراء رافعه برجيه \ 30 طن – كات )
240 الى ح \ البنك الاهلى
شيك رقم .... لامر .....
خلى بالك انا لحد دلوقتى لم تصلنى الفاتوره بتاع الاصل ولم اثبته اصلا الا بعد التركيب الكامل و التجربه والعمل و بنستلم الاصل كلما و ندفع الباقى 100 الف و نثبت الاصل عندى كالتالى ,,,
740 من ح \ الاصول الثابته
- الات و معدات \ رافعه برجيه كات – 30 طن
الى مذكورين
640 ح \ انفاق استثمارى
- شركه الرافعه البرجيه الحديثه
100 ح \ البنك الاهلى
- شيك رقم .... لامر ....
و ممكن انى اوصل الدفعه 100 الف للشركه الاول و بعدين اثبت الاصل و الاتنين عادى يا برنس
كده انا اثبت الاصل و قفلت حساب الشركه و تعالى نشوف مكانه فى الدليل :
الاصول >> الاصول الثابته >> انفاق استثمارى >> شركه كذا كذا كذا
ده من اكتر الاسباب الى خلتنى مقتنع بيه بدلا من مدينى و بتاع .. لان الحساب ده طبقا للدليل المحاسبى الموحد مكانه فى الاصول الثابته تحت كل انواع الاصول الثابته ,,وتعالى نشوف كده حاسبه الفرعى فى الاستاذ ..
ح \ شركه الرافعه البرجيه الحديثه
| التاريخ | بيان | مدين | دائن | رصيد |
| | ح \ البنك | 200 | | 200 |
| | ح \ البنك | 200 | | 400 |
| | ح \ البنك | 240 | | 640 |
| | ح \ البنك | 100 | | 740 |
| | ح \ الاصول الثابته | | 740 | 00 |
| الرصيد | 740 | 740 | 00 | |
بكده نكون قفلنا الحته دى ... و عاوز اقول كمان حته مهمه اوى كنت نزلتها فى محاضره على المنتدى بتاع الانفاق الاستثمارى ,, اللى قلنا فيها _ بفرض انى شركه مقاولات و عاوز اعمل مبنى ادارى جديد ( اصل ) ... هفتح ليه حساب ايه ؟؟؟ قلنا عليها ساعتها هفتح حساب اصول تحت الانشاء .. وده باين من اسمه انى بنفق طول السنه علشان استثمرها يعنى بنفق علشان انشاء اصل ,, و الاصول ده طبعا من اهم مصادر الانفاق و الاستثمار و حاجات كتير كده .
( هـ ) الاصول تحت التنفيذ .,, عاوز اقول برضو انى لما بعمل حتة اصول تحت الانشاء بفضل طول السنه اعلى عليها الحسابات و هو برضو حساب وسيط يعنى بقفله اخر ما اخلص الاصل تماما .. و كل ما اصرف بند بعليه على اصول تحت الانشاء ده بس بفتح له فرعيات كتير تحتيه علشان لما احب اعرف مثلا بند الخرسانه بس اتكلف كام .. و هل هى مساويه للى انا كنت حاطه فى الموازنه التقديريه ولا اكتر ولا اقل و ايه السبب و احلل الانحراف وكده يعنى .. اول ما اصرف شويه حاجات مثلا كالتالى بعمل القيد كالتالى ..
من ح \ اصول تحت الانشاء
- اسمنت
- خرسانه جاهزه
- - حديد تسليح
- رمل و بحص
- مواد سباكه
- دهانات
- اى حاجه تانى و كل مصاريفك تعليها بالطريق دى
الى ح \ الموردين او البنك او الصندوق او العهد او اى حته انت بتصرف منها ,,,
و بتفضل طول السنه تعمل نفس الحكايه دى ....... لحد اخر السنه ما ترصد الحساب ده و ترحله للسنه التاليه عادى جدااااا زى اى اصل عندك , و بيظهر فى الميزانيه تحت الاصول كلها ولا يحسب له اهلاك ,,,
بعد سنه او اتنين لما الاصل ده بيتكون خالص تمام التمام و اتشطب و اعتمدناه اصل بقفل الحساب الوسيط ده فى ح الاصل الجديد كده .. و بفرض انه ب 2 مليون جنيه ,,,
2 مليون من ح \ الاصول الثابته
- مبانى و عقارات
2 مليون الى ح \ اصول تحت الانشاء
نكمل الكلام و نقول انى انا حبيت الحساب ده و فضلته عن باقى الحسابات اللى فى ناس بتستخدمها لانى فى اخر السنه هلاقى ان الحساب ده تلقائى هيروح تحت الاصول الثابته فى الاخر خالص و عاوزين نؤكد ان الحساب ده بالرغم من وجوده ضمن الاصول الثابته الا انه لا يحسب له اهلاك ... ليه ؟؟؟؟ لانه اصلا انفاق و لسه مبقاش اصل , انما اول ما اثبته اصل يبقى ابداء فى اهلاكه عادى جداااااا ,,,,
يجى واحد ناصح يسالنى يقولى ايه الفرق بين الاصلو تحت الانشاء و اعمال او مشاريع تحت التنفيذ ؟؟؟
اقولو يا برنس يا معلم الفرق كالتالى ,,
اصول تحت الانشاء ده اصل ملكى ,, انما الاعمل تحت التنفيذ ده مشاريع للغير و بعمل القيد ده علشان اثبت حقى و اثبت حق الشركه بارباح العام و بصراحه الحته دى عاوزه محاضره لوحدها لان ليها طريقه حساب او طرق فى الحساب كده كتير و تلخبط وانا مش عاوز اسيح نفوخكم معايا لانى مبصدق اثبت لكم المعلومه ,, هع هع هع
( و ) حاله كمان .. بفرض انى بشترى الاصل ده من بلاد بره ... هعمل ايه يا استاذ ؟؟؟
قالك فى ناس بتفتح حساب اعتماد مستندى لانه فعلا اعتماد مستندى .... و بيمر بكل المراحل زيه زى البضاعه اللى بشتريها تماما .. و فى ناس قالت لا يا عم الحاج انا مش هضيفه ضمن الاعتمادات لانه مش بضاعه و انما هحطه برضو انفاق استثمارى .. و الاتنين صح و عموما الحسابين دول حسابات وسيطه يعنى بفتحهم بشكل مؤقت لحد ما اقفلهم فى حساب البضاعه او الاصول ,, و الخطوات كده ,, مثلا اصل كله كله ب 900 الف ,,,,,,,,
عند فتح الاعتماد
750 من ح \ الاعماد المستندى – او انفاق استثمارى
- اصل ,,,,,,,,,
750 الى ح \ البنك
عند وصول الاصل فى الجمارك و دفعنا الجمارك و التخليص و بلابلابلابلا
من ح \ الاعتماد المستندى – او الانفاق الاستثمارى
- جمارك
- اكراميات و اتعاب
- ارضيه و خلافه
- نقل
- تركيب و تثبيت
الى ح \ البنك او الصندوق ( الطريقه الى دفعنا بيها )
و بعدين نقفل حساب الاعتماد او الانفاق و نفتح ح الاصل
900 من ح \ الاصول الثابته
- معده كذا كذا
900 الى ح \ انفاق استثمارى – او اعتماد ( ولو انى افضل انفاق فى حاله الاصول و اعتماد فى البضاعه)
ولو عاوزين تعملو حساب استاذ و شوفو الخطوات هتلاقو الخطوات زى اللى قبله تمام و عادى جدا جدا جدا ,,
مش عارف هل هناك حالات تانى وانا ناسى ولا انا هيست خلاص ولا ايه ؟؟؟ بس عموما انتو عارفين ان لو حد عنده اى تساؤل بليز يقولى وانا تحت امره 24\7 دائــــما ,,,
بلله عليكم يا اخونا اى حد عنده اى تساؤل ولو مش مهم حتى او اى استفسار او حته وقفت فى طريقه و صعبه الفهم عليه يقولو بسررررعه و لايحرمنى ... لانى محتاج لكم اوى اوى مش انتو اللى محتاجنى ...
تعليقات
إرسال تعليق