تكلم النهرده عن الاطار النظري للمحاسبه الماليه :
نبدأ بتعريف المحاسبه:
هي نظام للمعلومات يقوم بترجمه الاحداث الاقتصاديه الي معلومات مفيده تساعد اطراف عده ف اتخاذ القرارات الاقتصاديه.. يعني ايه الكلام ده؟
يعني اي محاسب لازم يكون عنده نظام معلومات او سيستم يسجل من خلاله جميع الاحداث الماليه ( سواء عمليات بيع او شراء او ارباح او خسائر الخ) وتتحول الي شكل تقارير بتاخدها الاداره عشان ع اساسها بتاخد قرارات تؤثر في نشاط المؤسسه .
وبالتالي المحاسبه هي تسجيل وتبويب وتلخيص للاحداث الاقتصاديه وفقا لقواعد واجراءات واساليب مستمده من المبادئ المحاسبيه .( التعريف ده مهم جداااا لان هوا ده بأختصار المحاسبه كلها ويعتبر كل اللي درسناه متلخص ف التعريف السابق) .
وطبقا للتعريف السابق بنسجل كل العمليات داخل المؤسسه سواء عمليات بيع او شراء او عمليات مثلا خاصه برواتب الموظفين وهكذا وبدايه التسجيل بتبدأ بقيد يوميه
ثم التبويب او الترحيل في دفاتر الاستاذ
واخيرا التلخيص وده بيتم عن طريق القوايم الماليه وهي( قائمه الدخل وقائمه المركز المالي وقائمه التدفقات النقديه وقائمه التغير في حقوق الملكيه.)
ونوضح الكلام السابق بطريقه اخري ونقول ان الاحداث الاقتصاديه مثل عمليات الشراء والبيع والتغيرات في الممتلكات (شراء او بيع اصول) والتغيرات في الالتزامات ( مثل ارصده الموردين او التزامات الموظفين ) كل هذه الاحداث يتم ادخالها في عمليات محاسبيه وهي التسجيل والتبويب والتلخيص لتخرج منها تقارير تخص الجهات المستفيده يعني التقارير اللي بتطلع دي بيحتاجها جهات معينه عشان يستفيدو من المعلومات اللي فيها والمستفيدين دول هم: ١-اداره المنشأه : لانها تحتاج من الاداره الماليه تقارير لفهم الوضع المالي الحالي من ربح او خساره او اصول او التزامات .
٢- الموظفين : ودول عشان بيحتاجو تقارير ماليه توضح مرتباتهم المستحقه .
٣- المستثمرين : طبعا عشان بيجي مستثمرين للشركه ويحطوا فلوسهم فيها فبيطلبوا قوائم ماليه يعرفوا منها الشركه دي بتكسب ولا بتخسر عشان لما يحطوا رأس مال معين يبقوا متأكدين انه هيزيد مش هيقل وانه لو حط مليون ياخده مليون ونص .
٤-اصحاب الشركه: ودول معروف انهم بيبقوا حاطين فيها فلوس ويهمهم انهم ياخدو التقارير دي.
٥- المقرضين: عشان قبل ما يدولك قروض لازم يشوفو قوه المنشأه من ربح وخساره وهل هناك ازمه ماليه تخص الشركه ام لا.
٦- الاجهزه الحكوميه وتشمل الضرايب والدخل والزكاه وطبعا بتحتاج التقارير عشان تشوف عليك ضرايب ام لا وهكذا .
تعليقات
إرسال تعليق